Lagran - Berdintasunaren aldeko escape rooma - laia

Ausartuko zinatekete berriro ere denboran atzera bidaiatzera? Ezer ez da dirudiena. Dena aldatzen da. Jauregi bera, enigma berriak eta argitzeko erronkak. Istorioak aurrera jarraitzen du. Murgildu zaitez mugimendu feministaren iraganeko beste abentura batean, II. Errepublikako beste pertsonaia bat ezagutzeko. Berdintasunaren bila, historian nabarmendu zen beste emakume bat. Bidaia honetan, Maria de Maeztu izango dugu bidelagun. Maeztuk dena eman zuen emakumeen hezkuntzaren alde, unibertsitatean sartzeko aukera izan zezaten. Pedagogoa eta irakaslea, Gasteizen jaio zen eta Lizarran lurperatu zuten. Madrilen, neskato ikasleentzako barne-egoitza sortu eta zuzendu zuen, eta emakumeen Club Lyceum delakoaren parte izan zen. Bi erakunde horietan, Clara Campoamor garaikidearekin batera egindako proiektuetan parte hartu zuen. Denboran zeharreko bidaia honetan agerian geratuko da gaur arte lortutakoa, baina baita errealitate gordina eta aurrera egiteko geratzen zaiguna ere, soldata-arrakala eta genero-indarkeria bezalako auziei dagokienez.